"ETV" телевиз "Саятан болгох дамжаа" МУСК

      Санхүүгийн зохицуулах хорооны захиалгаар " Моторын дуу" уран бүтээлийн нэгдлийн бүтээсэн "Саятан болгох дамжаа" МУСК-г танд толилуулж байна.

Энэ кино "Санхүүгийн үйлчилгээний хүртээмжийг нэмэгдүүлэх" төслийн хүрээнд нийгмийн зорилтот бүлгийнхэнд санхүүгийн боловсрол, санхүүгийн үйлчилгээний талаарх олон төрлийн мэдээллийг хүргэх зорилгоор 24-н ангитайгаар бүтээгджээ. Тус киноны гол дүрийн баатруудын амьдралд тохиолдож байгаа санхүүгийн ололт амжилт, саад бэрхшээл түүнийг шийдвэрлэж байгаа арга барилыг өнөөгийн Монгол улсын бодит амьдралд тулгуурлаж, санхүү мөнгөний харилцаагаар дамжуулан адармаатай үйл явдлаар баяжуулж олон нийтийн хүртээл болгожээ. Та тус киног "ETV" телевизээр өнөө орой 2019.03.07-ны 22.40 цагаас үзээрэй. Таны санхүүгийн мэдлэг улам өндөр болог!

Боловсрол ТВ "Мөнгөтэй зочин" шоу нэвтрүүлэг

   Өнөө орой буюу 2019.03.05-ны Мягмар гаригт Боловсрол ТВ-р "Мөнгөтэй зочин" гэр бүлийн шоу нэвтрүүлгийн ээлжит дугаар гарах боллоо. Америкийн алдарт Elen шоу-ны дугаараар гардаг "Cash At Your Door" нэвтрүүлгийг албан ёсоор Монголд хийж эхэлсэн билээ.

Хөтлөгч, мөнгөтэй зочин Д. Баяр айлд зочлон очиж, ганцхан асуулт   тавиад түүнд хариулж хожсоноор, тэр айл нэвтрүүлэгт оролцох боломжтой болно. 10 асуултанд хариулж чадвал 2 сая хүртэл төгрөг хожих боломжтой. Ялагч болохын тулд гэрийнхээ тухай сайн мэддэг байх ёстой. Хөршөөсөө тусламж авсан ч болно. Танд нэг удаа алдах боломж бий, харин 2 дах удаагаа алдвал мөнгөө алдана. Мөнгөтэй зочны шинэ аялал эхэллээ. Хаалгаа нээгээд мөнгө хожих дараагийн айл хэнийх байх вэ??? Та "Мөнгөтэй зочин" нэвтрүүлгээ 20.50 цагаас Боловсрол телевизээр үзээрэй! 

Боловсрол ТВ "3 сая инээд" шоу нэвтрүүлэг

       Та бүхэндээ "3 сая инээд" шоу нэвтрүүлгийг үзэх санал тавьж байна. Дэлхийн 10 гаруй оронд амжилттай хийгдэж олон сая үзэгчдэд инээд хөөр бэлэглэсэн тус шоу нэвтрүүлэгт 16-аас дээш насны хошигнох дуртай, авьяастай, мэдрэмжтэй хүн бүхэн оролцох боломжтой юм.

Уг нэвтрүүлгийг 2011 онд "Рассемши комика" нэртэйгээр Украйны "Интер" телевизээр цацаж эхэлсэн бөгөөд одоогийн байдлаар 15 улирал амжилттай цацагджээ. Шведийн "Ecco Rights" компани албан ёсны эрхийг нь эзэмшдэг тус нэвтрүүлгийг Монголд "3 сая инээд" нэртэйгээр хүргээд байгаа билээ. Нэвтрүүлэг нийт 5-н үе шаттай. Шат бүр 1 мин-ы турш үргэлжилнэ. Оролцогч нь нэвтрүүлгийн гол дүр болох хоёр эрхмийг дүрмийн дагуу өгөгдсөн хугацаанд инээлгэж чадвал нэвтрүүлгийн зүгээс бэлдсэн мөнгөн шагналын эзэн болох юм. Ингэхдээ стэнд-ап, онигоо, шог үзүүлбэр, элэглэл, илбэ гэх мэт хошин урлагийн бүх төрлөөр хүчээ сорих боломжтой юм. Тэрээр өгөгдсөн эхний минутдаа амжиж хоёр эрхмийн нэгийг нь л багахан инээлгэх төдийд 100.000 төгрөгийг өөрийн болгоно. Оролцогч мөнгөө аваад нэвтрүүлгийг орхиж болно, эсвэл хожлын мөнгөө дэнчин тавиад дараагийн минутыг сунгаж 300.00 төгрөгийн төлөө тоглох эрхтэй. Энэ мэтчилэн гурав дахь минутад 500.000 төгрөг, дөрөв дэх минутад 1 сая төгрөг, хамгийн сүүлийн буюу 5 дах минутдаа амжин инээлгэж чадвал 3 сая төгрөгийг хожих юм. Өнөөдөр буюу 2019.03.03-ны Ням гаригт та Боловсрол ТВ-р  21.00 цагаас гарах ээлжит "3 сая инээд" шоу нэвтрүүлгийг үзэж, хэн гэгч мэдрэмжтэй залуу эсвэл бүсгүй оролцож, таныг болон зочдыг инээлгэж чадах нь уу? гэдгийг үзэх л үлдлээ. 

SBN телевиз "Анхны алхам" МУСК

         Өнөөдөр буюу 2019.03.02-ны 23.20 цагаас SBN телевизээр "Анхны алхам" МУСК гарах боллоо.   Ч. Гомбын зохиол, Г. Жигжидсүрэн найруулагчийн найруулга тус кино 1969 онд бүтээгджээ.

Сургуулийн танхимд заалгасан онолын мэдлэгээ практик амьдралаар батлан арвижуулснаар амжилтанд хүрч чаддагийг харуулж, хүмүүс хөдөлмөрийн явцад бие биенээ таньж арвижуулснаар ахмад, залуу үеийн харилцаагаар дамжуулан үзүүлжээ. Хөдөө аж ахуйн сургуулийн оюутан Мядаг дадлага хийхээр Дорж даргатай хадлангийн бригадад томилогдон ирнэ. Нутгийн хашир өвгөд Балдан, Жүгдэр, буриад Базар болон залуу хадланч Болд нар гар нийлж ажилладаг туршлагатай хадланчид гэдгийг үл ойшоон өөрийн заалгасан номын дагуу тэдэнд хадлангийн хугацааг мөрдүүлэх гэж оролдсон нь ялимгүй зөрөлдөөн үүсгэх боловч ажлын явцад бие биенээ харилцан ойлголцоно. Ажлын анхны алхам төдийгүй анхны хайрын оч цахилж амьдралын анхны алхмаа хийнэ. 

Хөнгөн жигүүр ургаж гүйцээд

Холын тэртээг шувууд зорилоо

Онгон насны хосгүй учралаар

Хайрын дээдээр чамдаа даслаа.....гэсэн дуутай, тус киноны гол баатруудын дотоод ертөнцийн олон өнгө аясыг тэдний ахуй амьдрал, зан төрхийн онцлогтой нягт холбон үзүүлснээр үзэгчдийн сэтгэлд хоногшин үлдсэн сонирхолтой дүрүүдийг бий болгожээ. Киноны гол дүрд Б. Цэцэгбалжид, Ч. Хүрлээ, С. Цэрэндаш, Н. Цэгмид гэх жүжигчид  тогложээ. Монголын кино урлагт нандин сэтгэлийн хөдлөл, уянгын барилыг нэвтрүүлсэн шинэлэг бүтээл болсон учраас 1970 онд Ташкент хотноо болсон Ази-Африкийн орнуудын олон улсын киноны анхдугаар наадмын тусгай шагнал, цом хүртэж, найруулагч Г. Жигжидсүрэн ЗХУ-н Энхтайвны хорооны хүндэт дипломоор шагнагдаж байжээ. Та амралтын өдрөөрөө Монголынхоо киног үзэж, үдшийг таатай өнгөрүүлээрэй.  

TV8 телевиз "Анирлагч" МУСК

     Д. Энхбаатарын зохиож, найруулсан "Анирлагч" МУСК-г өнөөдөр буюу 2019.02.22-ны 22.00 цагаас та TV8 телевизээр үзээрэй. Амар студи 2014 онд тус киног бүтээсэн бөгөөд гол дүрд Р. Адъяа, Д. Гүрсэд /МУГЖ/, Ц. Баясгалан, Б. Баярсанаа, Д. Шүүдэрцэцэг, Э. Ууганбаяр нар тогложээ.

Хөдөөгийн буйдхан, зэлүүд, байгаль цогцолсон сайхан газар Хунзаяа, Хунсар гэсэн үзэсгэлэнт хоёр охин, охидоо хээрийн ширүүн амьдрал, эрчүүдийн шуналт сэтгэлээс хамгаалах ээжийн хамт амьдарна. Тэдний хайрын түүх, амьдрал ахуйг та тус киноноос сонирхох болно. Хүн төрөлхтний хамгийн нандийн зүйл болох Хайр гэгч зүйл бидний эргэн тойронд оршин буй. Хэрэв та зүрх сэтгэлээсээ анирлавал мөнхийн хайрын гэрч болох юм. 

Royal HD телевиз "Сумандаа сайхан амьдаръя" төсөл нэвтрүүлэг

        2014 оноос Royal HD-р цуврал хэлбэрээр гарч буй “Сумандаа сайхан амьдаръя” төсөл нэвтрүүлгийг та өнөөдөр 18.35 цагаас үзээрэй.

Энэхүү нэвтрүүлэг нь өргөн уудам, сайхан нутагтай, мал аж ахуй эрхэлдэг Монгол түмэн бидний үзэж сонирхох нэвтрүүлгийн нэг юм. Төсөл нэвтрүүлгийн зорилго нь: Илүү таатай амьдралыг эрэлхийлж их хот руу шилжин суурьшиж буй хөдөөгийн иргэдэд өөрийн төрж, өссөн, аав ээжийн нутагтаа яавал таатай, сайхан амьдарч болох арга замыг ухааруулж, ойлгуулахаас гадна хотын хүн амын механик өсөлтийг зогсоох юм. 21 аймаг, 331 сумд 5-н жилийн туршид хүрч ажиллах төслийг санаачлагчид: “Уг нэвтрүүлгийг үзсэнээр хүмүүс хөдөөд олноороо сайхан амьдарч, улмаар хотын утаа, агаар, хөлсний бохирдлыг буурахад нэмэр болно” гэж үзжээ. Үүгээрээ ч зөв бодлоготой, эрч хүчтэй ажиллаж, амжилтанд хүрч буй учраас “Монголын Маркетингийн Холбоо”-оос 2016 онд “Оны шилдэг контент”-оор шалгарсан. Уг нэвтрүүлгийг та үзээд суманд амьдрах таатай боломж байгаа гэдэгт эргэлзэхгүй болов уу. 

Боловсрол ТВ "Монголчууд XX зууны эхэнд

       “Монсудар” хэвлэлийн газраас эрхлэн гаргасан “Монголчууд” ботийн эхний цуврал номноос бэлтгэн хүргэж байгаа “Монголчууд XX зууны эхэнд” нэвтрүүлгийг Боловсрол ТВ-р өнөө шөнө буюу 2019.02.20-ны 01.00 цагаас үзээрэй. 

Энэ нэвтрүүлэг нь кино боловсрол олгох хөтөлбөрийн дагуу хийгдсэн бөгөөд Монголын түүхийн хувьд XX зууны он жилүүд асар их өөрчлөлт, зөрчил, тэмцэл, шинэчлэл, дэвшлийг агуулсан он жилүүд байжээ. 100 гаруй жилийн тэртээ монголчууд бид юу идэж, ууж, өмсөж, хэрэглэж, ямар гэрт амьдарч, энэ ертөнцийн хүмүүсийн амьдралыг хэрхэн ойлгож, нүүдэлчин уламжлал, удам угсаа, соёлоо хэрхэн хадгалж байсныг цуврал хэлбэрээр үзүүлдэг. Мөн XX зууны эхээр 200 гаруй жил Манжийн эрхшээл дор “Мөхөж буй үндэстэн” хэмээгдэж байсан Монголчууд хэрхэн тусгаар тогтнож, сэргээн төвхнүүлж байсан үйл явдлыг тодорхой харуулах болно. 

UBS телевиз "Баруун т@рхи буюу соёлын довтолгоо"

   UBS телевизээр үзэгчдэд хүрч буй “Баруун т@рхи буюу соёлын довтолгоо” нэвтрүүлгийг та өнөөдөр Ням гаригийн 19.30 цагаас сонирхон үзээрэй.

Нэвтрүүлгийн төслийг санаачлагч Н. Ганбат болон Б. Долгион /МУУГЗ/ хоёр удирдан явуулна.  Уг нэвтрүүлэг нь зочдыг урьж, хамтран ярилцаж, санаа бодлоо солилцохоос гадна нийгэмд тохиолддог хүмүүжлийн зарим нэг гажуудлын талаар хуулийн ухааны доктор Батзориг оролцож зөвлөгөө өгдөг. Мөн хөгжмийн булангаараа түүхт хамтлаг, дууг сонсгон түүний талаар сонирхолтой мэдээллийг сонирхуулна. Нэвтрүүлгийн зорилго: Соёлтой, хүмүүжилтэй хүмүүнлэг иргэнийг төлөвшүүлэхэд чиглэгдсэн. Хүний баруун, зүүн тархи нь 2 тустай систем бөгөөд хүүхэд байхад Баруун тархи илүү ажилладаг байна. Үүний ачаар хорвоо ертөнцийг илүү таньж мэднэ гэдэг. Баруун тархины хөгжил давамгайлсан хүн бүтээлч, урлаг, уран сайхны мэдрэмж өндөртэй, зөн билигтэй, мөрөөдөмтгий байдаг. Тийм учраас хүмүүс бид зүүн тархиа амрааж, баруун тархиа хөгжүүлэхийн тулд дуу хөгжим сонсож, уран зураг үзэх нь тустай. Та өнөөдрийн зочны ярилцлагыг сонсож, дуу хөгжмөөс таашаал авч, баруун тархиа бага ч болов хугацаанд ажиллуулаарай. 

MN25 телевиз "Урт цагааны гудамж" нэвтрүүлэг

       Монголын анхны охидын хамтлагийн нэг болох “Спайк” хамтлагийн гишүүн, дуучин Номикогийн халуун дотно, хөгжилтэй яриа өрнүүлж, хөтлөн явуулдаг 

“Урт цагааны гудамж” нэвтрүүлэг өнөөдөр яг одоо “MN25” телевизээр 22.00 цагаас гарч эхэллээ.  “MN25” телевизийн байр урт цагааны гудамжны баруун үзүүрт  байрладаг бөгөөд уг нэвтрүүлгийг дулааны улиралд телевизийнхээ дээр агаарт, харин хүйтний улиралд телевиз дотроо явуулдаг болохоор магадгүй энэ нэвтрүүлгийг  “Урт цагааны гудамж” гэж нэрлэсэн болов уу. Та бүхэнд сонирдуулахад өнөөдөр буюу Гэгээн Валентины өдрийн зочдоор нь дуучин Зоригт, Хишигдалай болон Эмоци хамтлагийн жүжигчин Цогтбаяр    нар оролцож байна. Тэдний сонирхолтой яриа, дуу хуурыг нь сонсож, хөгжилдөн,  таалан үзэхийг хүсвэл сувгаа “MN25” телевиз дээр тааруулаарай. 

TV8 телевиз "Хүргэн хүү" МУСК

      Монгол улс даяар “Нэгдэлжих хөдөлгөөн” өрнөж байсан түүхэн цаг үеийн хүмүүсийн ухамсар дах өөрчлөлт, улсын болон хувийн өмчийн сэтгэлгээний зөрөөг баян Жамцын гэр бүл, хүргэн хүү Дэмбэрэлийн харьцаагаар дамжуулан үзүүлсэн ахуй амьдралын бүтээл “Хүргэн хүү” киног танд толилуулж байна.

Уг киног Монголын кино урлагт эх Монгол орныхоо баялаг тэнэгэр нутаг, хүн ардынхаа ухаан цэлмэг, уужуу тайвныг дэлгэцнээ хурц тодоор харуулах чинхүү хүсэл эрмэлзлэлээр олон сайхан уран бүтээл туурвисан авъяас билэгт, их найруулагч Д. Жигжид 1970 онд С. Удвал, 

Д. Дожоодорж нарын зохиолоор бүтээжээ.

Мөн кинонд: охиноо баян айлын хүү Хайдавтай суулгах гэж зүтгэж буй ээж, түүнд нь Жамц баяны хариулж буй үг, үйлдэл, хөдөө нутгаа санан гэрийнхээ гадаа сууж буй өрөвдөлт ээж, 20-н шараа 2,3-хан хулганад идүүлээд халаглаж байгаа хэсэг гээд хөгжилтэй зураг авалт, торгон мөч, дүрүүдийг үзэгч олны сэтгэлд хоногштол бүтээсэн Монголын алтан үеийн нэрт жүжигчид Д. Найдан, Т. Цэвээнжав, Б. Дамчаа, Д. Довдон, Л. Цэндсүрэн С. Батсүрэн нар тоглосон. Энэхүү сайхан бүтээл болох “Хүргэн хүү” МУСК-гоо та TV8 телевизээр өнөө орой 23.05 цагаас үзээрэй.  

"Star" TV "Гайхамшигт уралдаан" нэвтрүүлэг

     2001 оноос эхлэн жил бүр Америкт зохиогдон хийгддэг, телевизийн сонирхолтой, хөгжилтэй  “Гайхамшигт уралдаан” буюу “The Amazing Race” реалити шоуны адал явдлыг үүсгэж буй ээлжит 11-н баг оролцсон нэвтрүүлэг “Star” телевизээр гарч эхэллээ.

Уг шоунд хоёр хүний бүрэлдхүүнтэй: 11-н баг оролцож дэлхийг тойрон аялахаас гадна шат, даваа бүртээ орон нутгийн огт танихгүй хүмүүстэй харилцах, бие бялдар, оюун санааны, хүнд хүнд сорилтуудыг (нисдэг тэрэг, усан онгоц, галт тэрэг, метро,  машин, автобус, түрээсийн тэрэг, завиар яван нэвтрүүлгийн даалгавар биелүүлэх) даван туулж, уралдааны төгсгөлд удаа дараа ялалт үзүүлж, түрүүлсэн нэг баг нь сая доллар хожих дүрэмтэй, уламжлалт бодит шоу билээ. Энэ удаагийн нэвтрүүлгээр урд урдын тэмцээнд оролцож байсан, Америкчууд болон дэлхийн хүмүүсийн зүрх сэтгэлд хамгийн их хоногшин үлдсэн 11-н баг (үеэлүүд, ээж-хүү, аав-хүү, ихрүүд, хайртай хосууд, найзуудаас бүрдэх) уралдаж, реалити шоу-ны бас нэгэн түүхийг бичиж байна. Та "Гайхамшигт уралдаан" нэвтрүүлгийг өнөөдөр "Star TV"-р 21.20 цагаас үзэж, тэдэнтэй хамт дэлхийг тойрон, түүх сонирхож, адал явдлаар аялна уу.

TV9 телевиз "Хүргэн, бэрийн уулзалт" зохиомж

        Монгол ард түмэн хотол олноороо өвлийг өнтэй давж, хавартай хавтай сайхан золгож, ихэс дээдэс, бие биесээ хүндэтгэж, буян хураан, шинэлцгээж буй "Цагаан сар"-ын баярт мөчид "TV9" телевизийн хамт олон та бүхэнд "Хүргэн, бэрийн уулзалт" хөгжилтэй, адал явдалтай зохиомжийг өргөн барьж байна.

Жич - Ээж аав хоёр нь хүү, охиноо гэр бүлтэй болгох гэсэн хүсэлдээ хөтлөгдөж, тэднийгээ ятгаж дийлэлгүй худал хэлснээр охин, хүү хоёр нь өөрсдийнхөөрөө арга хэмжээ авна. Энэ нь будлиан тарьж, тэдний гэр бүлд баярын өдөр  хүндхэн зөрчил учравч, бүх үнэн тайлагдаж   жинхэнэ хүргэн бэрүүдтэйгээ учран баяраа сайхан тэмдэглэн, зохиомж өндөрлөх болно. Монгол түмэн та бүхэн баярынхаа өдөр,  шинийн 2-н буюу 2019 оны 02 сарын 06-нд 20.20 цагаас "Хүргэн, бэрийн уулзалт" зохиомжоо үзэж, сайхан шинэлээрэй. 

"UBS" телевиз "Мөнх тэнгэрийн хүчин дор" МУСК

     Монголын тулгар төрийг үндэслэгч, их эзэн хааны Чингис хааны амьдралыг харуулсан түүхэн бүтээл болох "Мөнх тэнгэрийн хүчин дор" кино 1992 онд бүтээгджээ.

Киноны зохиолыг Д. Маам, С. Эрдэнэ, Д. Батбаяр, ерөнхий найруулагч төрийн соёрхолт Б. Балжинням, зураглаач Л. Шаравдорж, гол дүрд А. Энхтайван, Н. Сүххуяг, Н. Сувд, С. Сарантуяа, Ц. Төмөрбаатар нар болон олон уран бүтээлчид ажиллажээ. Тэмүүжин хүү 13 наснаасаа эхлэн эцгийн голомтыг залгамжилж өшт дайсан Татар иргэдээс өшөөгөө авна. Хамаг Монголын хаан болох замд нь багын анд Жамуха нь хүртэл саад болж эцгийн оронд эцэг болсон Хэрэйдийн Тоорил ванг хүртэл түүний эсрэг босгоно. Өнөөдөр та "UBS" телевизээр 23.20 цагаас гарах "Мөнх тэнгэрийн хүчин дор" МУСК-ны I ангийг үзээрэй.  

МҮОНТ "Хорьдол Сарьдагийн нүүдэл" баримтат кино

      Монголчууд эрт дээр үеэс нүүдэлчдийн соёл иргэншилтэй ард түмэн байсан гэдгийг нотлох нотолгоо эдүгээ Дархадын нутагт хадгалагдсаар үлджээ.

Хөвсгөл аймгийн нутагт орших Хорьдол Сарьдагийн нуруу нь уулын нуга, тайга, хээр хосолсон, байгалийн унаган төрхөө хадгалсан үзэсгэлэнт, дархан цаазат газруудын нэг юм. Энд л тэр өвөл, хаврын, тэнгэрийн нүүдэл 1000 хол жил өнөөг хүртэл үргэлжилсээр. Монгол орноо тойрон 21-р зууны эхэн үеийн Монголчуудын амьдрал ахуйг дүрс болон зургаар түүх болгон үлдээх зорилготой "Бидний цөөхөн Монголчууд" төслийн хэрэгжүүлэгчдийн бүтээсэн "Хорьдол Сарьдагийн нүүдэл” баримтат кино МҮОНТ-р өнөө орой буюу Баасан гаригийн 21.35-н цагаас үзэж, ард түмнийхээ ёс заншил, өв уламжлалын нэгээхэн өвөрмөц хэсгийг сонирхоорой. 

Eco Channel ТВ "Ээждээ ир" МУСК

     

         2016 онд "Ээждээ ир" киног найруулагч Ө. Мөнх-Эрдэнэ, зохиолч Б. Загдсамбар, гол дүрд жүжигчин С. Баттулга, О. Долгор, Г. Дөлгөөн, Б. Баттөгөлдөр нар бүтээжээ. Киноны дууг "Гурван бүдүүн" хамтлагийн дуучин Мөнгөншагай дуулсан байна. Мөнх-Өлзий энтертайнмэнт, нийслэлийн боловсролын газрын хамтын бүтээл болох уг киноноос та эхнэр, нөхөр 2-ын нэг нэгнээ гэсэн аугаа хайрыг мэдрэхээс гадна энгийн багш нарын амьдрал, сэтгэлийн хүчийг харах болно. Та "Eco Channel" телевизээр өнөө орой 23.00 цагаас "Ээждээ ир" МУСК-г үзээрэй.

"Боловсрол" ТВ "Яг түүн шиг" шоу нэвтрүүлэг

    "Боловсрол" телевиз, "Endemol shine group"-ын "Яг түүн шиг" шоу албан ёсны эрхтэйгээр 3 дах жилдээ Монгол улсад хүртээл болсон.

"Яг түүн шиг" шоу анх Испани улсад "Your Face Sound Famillar" нэртэйгээр зохион байгуулагдсан байна. Одоогоор дэлхийн 80 гаруй оронд албан ёсны эрхтэйгээр зохион байгуулагджээ. Энэ удаагийн манайд хийж буй дугаарт загвар өмсөгч Ж. Энэрэл, ая зохиогч, дуучин Б. Нацагдорж, "Sweetymotion" хамтлагийн дуучин Г. Сүндэрмаа, театр киноны жүжигчин М. Цэрэндолгор, "A sound" хамтлагийн дуучин Ц. Тэмүүлэн, дуучин, жүжигчин алдарт эх Ч. Очгэрэл, "Эмоци" хамтлагийн жүжигчин О. Тэмүүжин, загвар өмсөгч О. Билгүүн нар оролцсон нэвтрүүлгийг давтан үзүүлж байна. Та өнөөдөр буюу ням гаригийн 20.40 цагаас "Боловсрол"  ТВ-ээр хөгжөөнт, цэнгээнт "Яг түүн шиг" шоу нэвтрүүлгээр оролцогчид, оддыг хэрхэн дуурайж өрсөлдөхийг  үзээрэй. 

ETV “Бид” чөлөөт нэвтрүүлэг

    "ETV"-р эрхлэн гаргадаг “Бид” чөлөөт нэвтрүүлгийг энэ удаа онцолж байна. Нийгэмд зөв хандлагыг төлөвшүүлэх зорилготой, “Санаа зөв бол заяа зөв” гэсэн уриатай хэлэлцүүлэг нэвтрүүлэг юм.

 Хүмүүст, хүүхдүүдэд тэр тусмаа залуучуудад ямар асуудал тулгамдаж байгааг  тодорхой сэдвийн хүрээнд анхааран авч үзэж, хэрхэн шийдэх талаар яриа өрнүүлдэг. Өнөөдрийн 23.30 цагаас танд хүрэх ярилцлаганд "ETV" телевизийн сэтгүүлч, хөтлөгч Өсөхбаяр, Энхзаяа нар оролцож "Хандлага ба Неромаркетинг" сэдвээр санал бодлоо хуваалцан удирдаж явуулна. Энэхүү тархи судлалын сүүлийн үед судлагдаж эхэлсэн ШУ-ны сэдвийн хүрээнд: мэргэжлийн залуу судлаачийг урьж оролцуулан үзэл бодлыг сонсох болно. 

"Royal" HD TВ

      “Нийгмийн хөгжлийг дэмжигч” уриатай "Royal" Телевиз нь бодлого үйл ажиллагаа, уран бүтээлийн төрөл, зорилгоо “Нийгмийн сайн сайхан, хөгжил, бүтээн байгуулалт, олон талт хөгжлийн ойлголт ухагдахууныг сурталчлан таниулж, сурвалжлан мэдээлэх чиглэлээр анх 2011.11.11-нд туршилтын эфирээ HD форматаар хүргэсэн бөгөөд 2012.01.16-ны өдрөөс үндсэн хөтөлбөрийн дагуу үйл ажиллагаагаа явуулж эхэлжээ. 

Өдгөө мэргэжлийн 40 гаруй уран бүтээлчидтэй бөгөөд техник, технологийн өндөр түвшний гүйцэтгэл, бүтээлүүдийг харилцагчиддаа болон үзэгч түмэндээ үзүүлсээр байна. "Royal" HD телевизийн хамт олон улс төрийн нэг талын ашиг сонирхолыг илэрхийлэх өнгө аяс болон нийгмийн бухимдал, сөрөг дуулианыг дэвэргэх, соён гэгээрүүлэгч бус хандлагаар уран бүтээл туурвихаас татгалзан улс орныхоо хөгжлийг дэмжих, эерэг үр дүнд зорьсон зорилтот төслүүдийг санаачлан хэрэгжүүлсээр ирсэн. 

Бүхий л салбарт оюунлаг, гэгээлэг уур амьсгал, эерэг хандлага, өөрчлөлтүүдийг мэдрүүлэхийг эрхэмлэн, нэвтрүүлэг хөтөлбөрөө нийгмийн 70 хувийг бүрдүүлж байгаа 35-аас доош насныхан буюу залуучуудад хандсан, тэднийг соён гэгээрүүлэх, зөв замаар, зөв алхахад гэрэл гэгээ тусгах зорилтод нийцүүлэн ажиллаж байна.Тухайлбал үзэгчдийн танил болсон төдийгүй, олны зүгээс талархал хүлээсэн зарим нэвтрүүлгүүдээс дурьдвал:

• “Сумандаа сайхан амьдаръя”
• “Согтуу Монголоос - Саруул Монгол”
• “Учралын баяр”
• “Бизнес ба боломж”
• “Залуу лидер” гэх мэт

“SBN” телевиз“Миний толгойны өвчингүүд” ОАСУК

        Хүмүүсийн энгийн амьдралын өдөр тутам тохиолддог аар саархан асуудлыг хошин хэлбэрээр үзүүлсэн, Солонгосын “Миний толгойны өвчингүүд” инээдмийн олон ангит кино “SBN” телевизээр гарч байна. Киноны утга агуулгын хувьд: Гэр бүлийн нас биенд хүрсэн 3-н хүү, өөрсдөөс гадна эцэг, эх, бэр, хүүхдүүдэд тохиолдсон зүйлийг өөр хоорондоо ярилцаж, хэлэлцэхдээ буруу, зөрүү шийдвэр гаргаж, тэр нь будлиан үүсгэж байнга адал, явдалтай учирна. Өнөөдөр 22.50 цагаас 13-р анги нь “SBN” телевизээр гарах “Миний толгойны өвчингүүд” киног үзээрэй.

"ТМ" телевизийн танилцуулга

         ТМ телевиз нь 2006.04.01-нд анхны эфирээ үзэгч олонд хүргэсэн бөгөөд ""Танин мэдэхүй" нэртэйгээр Улаанбаатар хотод бүх кабелийн телевизүүдтэй шилэн кабелиар холбогдсоноос гадна “DDish TV” компанитай хамтран хиймэл дагуулаар монгол орон даяар 21 аймаг, 361 сумын малчин өрх айлуудад болон Азийн 29 оронд өөрсдийн нэвтрүүлгүүдийг дуу, дүрсний өндөр чанартайгаар эфирээ шууд дамжуулж байна.

“Хариуцлагатай нийгмийн төлөө” уриатай тус телевиз нь мэргэжлийн чиглэлээр сургууль төгссөн ур чадвар, эрч хүчтэй уран бүтээлч залуудаар нүүр царайгаа тодорхойлж,  Улаанбаатар хотын 12% буюу 120.000 гаруй үзэгчид болон орон нутгийн үзэгчдэд хандсан хөтөлбөрүүдийг төлөвлөн, үзэгчдийн хүртээмж, сонирхолыг үнэлэн судалж, жилд хөтөлбөрийн хүрээнд 25-28 тогтмол нэвтрүүлгийг бэлтгэн хүргэдэг. Нийт эфирийнхээ 60-аас доошгүй хувийг өөрсдөө бэлтгэхээс гадна гадаадын сонирхолтой танин мэдэхүйн нэвтрүүлэг, баримтат кино, шоу нэвтрүүлгүүдийг чанарын өндөр түвшинд орчуулан дуу оруулж үзэгчдэд хүргэн ажиллаж ирсэн. Түүнчлэн гадаад харилцаагаа өргөжүүлэн 

• Японы элчин сайдын яамтай хамтран японы аж амьдрал, түүх, соёл, өв уламжлалыг сурталчлах “Japan Topic” буюу “Японы амьдрал” нэвтрүүлэг болон
• ХБНГУ-ын “Deutsche Welle” телевизтэй 6-н жилийн турш тасралтгүй хамтран ажиллаж германы төдийгүй гадаад улс оронд болж байгаа үйл явдлын мэдээ, мэдээллүүдийг Монголынхоо үзэгчдэд хүртээл болгодог бөгөөд улирал тутамд тус телевизээс мэргэжилтэн урьж уран бүтээлчиддээ сургалт зөвлөгөө аван хамтран ажилладаг байна.
• 2009 онд техникийн шинэчлэлт хийж АНУ-ын “Data Video” фирмийн техник тоног төхөөрөмжөөр тоноглогджээ.

Ийнхүү иргэний сэтгүүл зүйд суурилан, үзэгчдийнхээ санаа бодлыг тусган, тэдний дуу хоолойг сонсон 2012 оноос Full HD форматаар дараах нийгэм, эдийн засгийн нийтлэл, нэвтрүүлгээ цацаж байна. 

•  “Зөв Монгол” хэлэлцүүлэг , ярилцлага
• “Топ мессеж” амралтын хөтөлбөр
• “Танил хүн” нэвтрүүлэг
• “Нүүдэлчин”    гэх мэт. 

“Молор” ТВ “Шинэ үсгийн багш” МУСК

     Монголчууд бичиг үсэгтэй болж байсан үед хэрхэн соён гэгээрч, соёлын довтолгооныг бий болгож байсан чухал үйл явдлыг илтгэх, "Шинэ үсгийн багш" инээдмийн кино нь

1998 онд бүтээгдсэн бөгөөд зохиолч Б. Жамбалдорж,  найруулагчаар нь Б. Бадар-Ууган, зураглаачаар Л. Шаравдорж ажиллаж, Завхан нутагт зураг авалт явагдсан байна. Киноны гол дүрд Б. Гарьд, С. Сэлэнгэ, Д. Лхамхүү, Б. Тунгалаг, Д. Хүрлээ нар тогложээ. Аав ээж, ах эгч, өвөө эмээ шигээ хүмүүст шинэ үсэг заах балчирхан бор хүүг нутгийнхан нь Шинэ үсгийн багш гэж хүндэлнэ. Түүний хэлж буй үг, хийж буй үйлдэл бүхэн нь хэзээний том хүн шиг боловч хааяа ээждээ эрхлэх нь бага балчир гэдгийг нь илтгэмээр, Монголын хөрсөнд эрдмийн үрийг тарьж буй нь үнэхээр өхөөрдөм. Тулгаа хүү толгойгоо маажиж, Лагсал тугал өргөн, Дунжидмаа хайр сэтгэлдээ шатах нь кинонд хөнгөн инээдийг бэлэглэнэ. Та "Шинэ үсгийн багш" киног өнөөдөр 2019.01.20-ны Ням гаригийн 22.30 цагаас "Молор" ТВ дээр тааруулаад үзээрэй.      

"UBS" TВ “Асах гэрэл” гэрэл зурагчдын Уралдаант шоу нэвтрүүлэг

       Гэрэл зурагчид болон сонирхогчдод зориулсан авьяас, сэтгэмж, агшин, хурдаараа өрсөлдөх, энэ үгнүүдийн эхний үсгүүдийн товчлолоор нэрлэсэн

 "Асах гэрэл" уралдаант шоу нэвтрүүлэг “UBS” телевизээр цацагдаад нилээдгүй хугацаа өнгөрч байна. Гэрэл зургийг "Ертөнцийг гэрлээр бичих урлаг" гэж ярьдаг.  Уг нэвтрүүлэгт оролцогчид янз бүрийн даалгаврын дагуу тухайлбал: (байгаль, агшин, ан амьтан, хөрөг, мэргэжил бүхэн сайхан) сэдвээр авсан, фото зургаа танилцуулж, С. Цацралт /МУСГЗ/, Ц. Цэндпүрэв тэргүүтэй  шүүгчид үнэлэлт дүгнэлт өгдөг. Гэрэл зурагчид өөрсдөө бүтээлийнхээ зохиолч, найруулагч, мастер нь байдаг. Тэгвэл энэ шоу нэвтрүүлэгт оролцогчид өөр өөрийн дотоод мэдрэмж, харах өнцгийн хэлхээсийг өөрийн зурагтаа тусган харуулжээ. Түүнээс гадна зарим зургаа яруу найраг, зохиол, хөгжмийн аянд зориулж авсан байгаа нь тун сонирхолтой. Та шилдэг оролцогчдын бүтээлийг "Асах гэрэл” уралдаант шоу нэвтрүүлгээр өнөөдөр 2019.01.20-ны буюу Ням гаригийн 20.30 цагаас "UBS" ТВ-ээр хүлээн авч үзээрэй.

“NTV” телевизийн танилцуулга

    “NTV” телевиз нь 2006 оноос албан ёсоор үйл ажиллагаагаа эхэлсэн бөгөөд орчин үеийн тоног төхөөрөмж бүхий шинэ студиудэд долоо хоног бүр 7000 гаруй минутын улс төр, нийгэм эдийн засаг, танин мэдэхүй, түүх, соёл урлаг, спорт, энтертайнмэнт гэх мэт олон талын контент бэлтгэн үзэгчдэд хүргэдэг. 

“Үзэгч олон нийтэд мэдээлэл, танин мэдэхүй, цэнгээнт үзвэрийн альтернатив сонголт буй болгон монголын масс медиа салбарт өндөр байр суурь бүхий шилдэг энтертэйнментийн телевиз болж ажиллах нь “NTV” телевизийн үндсэн зорилго болдог. “NTV” ТВ нь 2006-2009 онуудад Хэвлэлийн хүрээлэнгийн судалгаагаар хамгийн их үзэгчтэй 5 телевизийн нэг, шилдэг энтертэйнментийн хөтөлбөртэй телевиз гэсэн нэр хүндийг үзэгч олноосоо хүлээн авч, олон улсын телевизүүдийн дунд зохион байгуулагддаг “NHK JAPAN PRIZE 2009” наадмаас UNICEF-ийн нэрэмжит шагнал хүртсэн. Өдгөө хэрэглэгчийн зах зээлд рейтингээр эхний 10-т орж байна. "Өөдрөг өнгө, өөр өнцөг" уриан дор "Мэргэжлийн чиг хандлага, өөдрөг өнгө аяс, тэнцвэртэй мэдээлэл түгээх" зорилготой "NTV" телевиз эфирээ 2009 оноос үндэсний хэмжээнд цацаж эхэлсэн бол 2013 онд Full HD формат руу бүрэн шилжсэн. 2016 онд Харилцаа холбооны зохицуулах хорооноос тус телевизийн зөвшөөрлийг "Эн Ти Ви"  бродкастинг ХХК эзэмшдэг гэж мэдээлсэн буюу энэ нь "Медиа групп"-ын  охин компани бөгөөд 50%-г УИХ-н гишүүн асан П. Батхүү, үлдсэн 50%-г түүний дүү П. Батсайхан эзэмшдэг гэсэн таамаг бий. Онцлох нэвтрүүлгээс дурьдвал: 

• “Ахлах тогоочийн заавраар”
• “Нийслэл хөтөч”, 
• “Чөлөөт эмэгтэйчүүд” гэх мэт

“Соён гэгээрүүлэгч” ТВ “Сонгомол номын сан” Төрийн соёрхолт, МУГЖ Д. Сосорбарам

    Номын цагаан буянд Монгол хүмүүн умбах болтугай. “Ном” бол мэдлэг боловсрол, тэсвэр хатуужил, сайн мууг ялгах чадварыг суулгаж өгдөг. 

Монголын Соёлын Өвийн шинжээч, судлаач МУСТА Цоодолын Жаргалсайхан-ы  бэлтгэн хүргэдэг “Номын цуглуулга” нэвтрүүлгийн энэ удаагийн дугаараар Төрийн соёрхолт, МУГЖ Догмидийн Сосорбарам оролцоно. Тэрээр “Номын санг каталоги маягаар хадгалах учиртай. Хүн бүрт өөрийн сонирхсон номын цуглуулгууд байдаг. Түүнийгээ хаана, яаж хадгалахаа хувь хүн мэддэг.” гэж хэлдэг. Түүний номын цуглуулганд: Анатомийн, чулууны, хөгжмийн, театр урлагийн, жүжигчдийн, дизайн, барилга байгууламжийн гэх зэрэг олон төрлийн сайхан ном байх бөгөөд түүнийгээ хаанаас, хэзээ ямар учраас худалдаж авч цуглуулсан түүхээ хүүрнэх болно. Мөн түүний өөр бусад цуглуулгыг сонирхох боломжтой юм. “Өөртөө үнэ цэнэтэй, хайртай байж чадсан хүн бусдыг хайрлаж чаддаг” гэж хэлэх дуртай, жүжигчин Д. Сосорбарам оролцсон “Сонгомол номын сан” нэвтрүүлгийг Маргааш буюу 2019.01.20-ны 11.10 цагт та “Соён гэгээрүүлэгч” телевизээр үзэж, түүнийг өөр нэгэн өнцгөөр хараарай.  

“SBN” TV танилцуулга

        2006.08.26-оос Улаанбаатар хот болон орон даяар нэвтрүүлгээ толилуулж байсан “SBN” телевиз өнөөдөр өөрийн гэсэн үзэгчидтэй, онцлогтой телевиз болжээ.

“Үндэсний хэмжээнд хэвлэл мэдээллийн олон талт үйл ажиллагаа явуулж, агшин болгонд, айл бүрт аз жаргал түгээж, хүн бүрийн танин мэдэхүйн хөтөч байна” гэсэн эрхэм зорилготой, “Дэлхийн энтэй медиа групп болно” гэх уриатай “SBN” TV нь анх байгуулагдсан цагаасаа мэргэжлийн өндөр түвшинд бүтээгдсэн энтертайнмент, соён гэгээрүүлэх, мэдээ мэдээлэл, кино болон гадаадын олон сонирхолтой нэвтрүүлгүүдийг бичлэгийн 4-н студи, иж бүрэн явуулын станци, "Sony" брендийн тоон технологийн шийдлээр улс орон даяар цацаж байна. Тус телевизийн "SBN news" мэдээллийн хөтөлбөрөөс гадна зарим нэгэн онцлох нэвтрүүлгээс дурьдвал: 

• “Дуртай өдөр” амралтын хөтөлбөр
• "Түүхэн хэлхээ"
• "Movie Talk"
• “Logo quiz” 
• “Нахиа” хүүхдийн хөтөлбөр
• “Эмч сонсож байна” шууд нэвтрүүлэг гэх мэт та бидний үзэх дуртай нэвтрүүлгүүд бий. 

МҮОНТВ “Brain wave” Англи хэлний уралдаант нэвтрүүлэг

    МҮОНТВ-р хүүхэд залуучуудад зориулсан “Brain wave” Англи хэлний уралдаант нэвтрүүлэг Бямба гариг бүрт үзэгч хүүхдүүд та бүхэнд хүрч байна.

Уг нэвтрүүлэг нь: Дэлхий дээрхи олон  хүмүүсийн  хоорондоо харилцах  гол хэрэгсэл болох, Англи хэлээр чөлөөтэй сайн ярьж, ойлгож, харилцаж сурахыг эзэмшүүлэх зорилготой бөгөөд зөвхөн Англи хэлээр явагддаг. Нэвтрүүлэгт хөтлөгчөөр Хобби сургуулийн гадаад багш Александр Фелла мөн шүүгчээр тус сургуулийн англи хэлний ахлах багш оролцдог. Нэвтрүүлэг бүрт: Англи хэлний мэдлэгийн түвшингээрээ уралдахаар сургууль тус бүрээс 5-н хүүхдээс бүрдсэн баг оролцож, сонирхолтой хөгжөөнт тоглоом, тэмцээнийг Англи хэл дээр явуулж хоорондоо өрсөлдөж улмаар шат, шатны ялагчийг тодруулдаг. Өнөөгийн глобалчлагдсан ертөнцөд англи хэл зайлшгүй сурах хэрэгтэй. Хэлтэй бол хөлтэй гэж ярьдаг. Тэгвэл хэл сурахыг ямар нэгэн ажил биш, хобби гэж үзэн хэл сурах үйл явцаас баяр хөөрийг мэдрэхэд энэхүү нэвтрүүлэг танд тусална гэдэгт бид найдаж байна. “Brain wave” нэвтрүүлгээр хүүхдүүд та бүхэн энэ 7 хоногт  ямар сургуулиуд хэрхэн оролцож, амжилт үзүүлэхийг МҮОНТВ-р өнөөдөр 2019.01.19-ны Бямба гаригийн 11.10 цагаас үзээрэй.  

“Eco Channel” “Хазаар цэцэгсийн дуулал” МОАУСК

       Хүмүүн бид эх орондоо амар тайван амьдрах хувь заяа, эрх чөлөө, амьсгалах цэвэр агаар, ариулах цэнгэг рашаан, адислах цэнхэр тэнгэр, сүүдрийг нь дэрлэж мөнх амрах уулсаа шунаг сэтгэлээсээ болж алдаж байгаа биш байгаа…..гэсэн санааг харуулсан 2017 онд хийгдсэн “Хазаар цэцэгсийн дуулал” Монголын олон ангит кино “Eco Channel” телевизээр гарч эхэллээ.  Киноны ивээн тэтгэгч, ерөнхий продюссер “Жигүүр гранд” группын гүйцэтгэх захирал Б. Халиунаа, зохиолч С. Цэрэндаваа, ерөнхий найруулагчаар П. Мөнхболд ажиллаж, Киноны гол дүрд Э. Монголжин, Б. Хунцэнгүүн, Д. Төмөртогтох, Д. Гүрсэд, Ц. Баярмагнай гэх зэрэг олон жүжигчин тогложээ. Кинонд Булган аймгийн Хангал сумын Хялганат тосгонд өрнөж байгаа амьдралыг дүрсэлжээ. Та уг киноны 3-р ангийг өнөөдөр буюу 2017.01.18-ны Баасан гаригт 20.00 цагаас үзээрэй.

“TV9” телевиз “Миа бид хоёр” хүүхдийн цуврал уран сайхны кино

         Сурагчдын амралтыг тохиолдуулан бяцхан хүүхдүүддээ зориулан гаргаж байгаа дараах цуврал хүүхэлдэйн киног онцоллоо. TV9 телевизээр “Миа бид хоёр” хүүхдэд зориулсан хүүхэлдэй болон хүүхдүүд оролцож тоглох олон ангит хүүхдийн цуврал кино гарч байна. 

Уг кино нь Итали-Герман-Канадад болох үйл явцыг өгүүлэх бөгөөд  дэлхийн 50 гаруй оронд худалдагдаж, 70 орны хэл дээр орчуулагдан гарч, дэлхийн олон орны хүүхэд багачуудад хүрчээ. 

Gerhard Hahn-ы зохиол, Английн  “Lucky Punch” студийн бүтээл юм. 

Киноны агуулгын хувьд:

     Киноны гол дүрийн Миа гэгч охины эцэг эх осолд орж өнгөрсөнөөр, охин сурагчийн солилцоогоор Италийн Флоренц хотын залуу хатагтайн сургуульд шинээр элсэн суралцаж, дотуур байранд амьдрахаар болсноор киноны үйл явц эхэлнэ. Бага байхаас аав нь үлгэрийн ном уншиж өгдөг байсан бөгөөд охиндоо нэгэн гайхамшигтай номыг үлдээсэн байдаг. Тэр гайхалтай “Сентопийн домог” гэгч номыг Миа охин  уншиж, ид шид рүү хөтлөх бугуйвчиндаа нууц үгийг шивнэж эхлүүт л тэрээр Ид шидийн ертөнц-өөр аялаж эхэлнэ. Жирийн хүмүүсийн ертөнцөд тэрээр хүрэн нүдтэй, бор үстэй энгийн л нэгэн охин юм. Үлгэрийн ертөнцөд харин Миа охин цэнхэр нүдтэй, улаан үстэй, далавчтай үзэсгэлэнт бүсгүй болон хувирдаг.

Аяллын явцад тэрээр нэг эвэртэй морьхонтой уулзаж түүнийг аврахаас гадна Мо болон Юко нарын элчтэй танилцаж, тоглож хөгжилдөж бас ч үгүй олон адал явдлуудтай, үлгэрийн баатруудтай учирч, тэдний зарим нэгийг аварч, зарим нэгний муу санааг илрүүлнэ. 

Хүүхдүүдээ өдөр бүр 17.30 цагаас TV9 телевизээр Миа охинтой хамт ид шидийн үлгэрийн ертөнцөөр аялаарай. 

"С1" Телевиз танилцуулга

         "С1" телевиз нь анх 2006 онд байгуулагдсан бөгөөд орчин үеийн дижитал дүрс бичлэгийг боловсруулах технологийг ашиглан хэрэглэгчдэд чанартай нэвтрүүлгүүдийг дамжуулан ажилладаг. Монгол улсад өрнөж буй бүхий л мэдээллийг түүвэрлэн хүргэдэг ба аль нэг талд үйлчилдэггүй, тэнцвэртэй үнэн бодитой мэдээллийг баттай эх сурвалжаас авч мэдээлдэгээрээ онцлогтой.

Бүтэц зохион байгуулалтын хувьд дараах албуудтай:

- Мэдээний

- Нэвтрүүлгийн
- Техникийн
- Санхүүгийн
- Маркетингийн
- Захиргааны албуудад нийт 70 гаруй уран бүтээлч, ажилтан, албан хаагчид ажиллаж байна. Анх "С1" телевиз-ийг Английн иргэн Бен Моёл удирдаж байсан бол одоо гүйцэтгэх захирлаар 2007-2012 онд тус телевизийн хэвлэлийн албаны даргаар, МУ-ын ерөнхийлөгч Х. Баттулгын хэвлэлийн төлөөлөгчөөр ажиллаж байсан Д. Ариунсэлэнгэ хашиж байна. 

Өдгөө нийгмийн бүхий л давхаргад нөлөөлөхүйц хүүхэд залуучууд, боловсрол, уламжлалт ёс заншил, эрүүл мэндийн чиглэлээр нэвтрүүлэг бэлтгэдэг уламжлалаа хадгалахын зэрэгцээ зохион байгуулалт, нэвтрүүлгийн бодлогоо боловсронгуй болгох, цогц өөрчлөлтүүдийг хийж, Олон улс хоорондын мэдээлэл солилцоо, дэлхийн хэмжээний онцлог үйл явдлуудыг түргэн шуурхай дамжуулах, мэдээлэл технологийн хурдацтай зэрэгцэн хөгжихийг зорин ажиллаж байна. Хүмүүст илүү их хүрсэн, сонирхолтой нэвтрүүлгүүдээс дурдвал:

• “Унагалдайн мухлаг”
• “Харандааны адал явдал”
• “Элсэн цаг” хэлэлцүүлэг ярилцлага
• “Алганы хээ” ток шоу
• “Цензургүй яриа” сурвалжлага, эрэн сурвалжлах  нэвтрүүлэг
• “Ээжүүд” ток шоу гэх мэт.